Pas 45-vitesh, Romela Begaj na bën të gjithëve krenarë, shpallet kampione bote

0
17

Peshëndgritja shqiptare është një nga sportet që na ka bërë më së shumti krenarë, ndërsa flamuri kuqezi është ngitur mes vendeve të para të podiumit. Kjo ndodhi edhe dje në botërorin e peshëngritjes që po zhvillohet në Shtetet e Bashkuara të Amerikës.

Sportistja Romela Begaj u shpall kampione bote 45 vitesh për Shqipërinë, sepse Begaj fitoi të artën në shkëputje, ndërsa në dygarësh u rendit e dyta, pas kolumbianes Leidi Jesenia Solid Arboleda.

Në shkëputje Begaj kreu 3 prova perfekte dhe ngriti 107 kg (rekord personal), ndërsa në shtytje ngriti 125 dhe 128 kg (rekord personal), por kur provoi 131 kilogramët, nuk ia doli dhe pësoi një dëmtim serioz në shpinë, duke mbetur e shtrirë në tokë dhe duke u larguar me ndihmën e stafit të saj. Një sakrificë e madhe për Begajn, që kishte dhimbje që më herët, por tentoi të pamundurën, pasi në provën e fundit kërkoi të siguronte vendin e parë, që ia mori Solis Arboleda, e jashtëzakonshme në shtytje, me 135 kg.

Erkand Qerimaj e mbylli në vendin e gjashtë në dygarësh garimin e tij në botërorin e peshëngritjes që po zhvillohet në Shtetet e Bashkuara të Amerikës.

Peshëngritësi shkodran realizoi vetëm 2 nga 6 provat në të dy stilet, duke zënë përkatësisht vendin e 4 në shkëputje dhe vendin e 9 në shtytje, ne peshën deri në 77 kg. Garimi i Qerimajt në stilin e shkëputjes nisi me peshën 155 kg, provë të cilën e realizoi me sukses. Në dy provat e tjera Qerimaj dështoi të ngrinte 157 kg.

Në këtë stil Qerimaj i rendit në vendin e katërt.

Jo më i letë ishte garimi në shtytje, ku pas provës së parë me 187 kg, Qerimaj nuk arriti të realizonte asnjë prej dy provave të tjera me 191 kg, duke e mbyllur garën në këtë stil në vendin e 9-të.

Nuk ka shkuar edhe aq mirë situata për sportistin tjetër shqiptar Briken Calja, i cili humbi ndjenjat pas garës si pasojë e dehidratimit.

Sportisti shqiptar që zuri vendin e katërt në dygarësh kaloi disa orë në spital, ndërsa raportohet se gjendja e tij është e mirë.

“Hëngra ushqimin para garës dhe fillova të kisha disa dhimbje barku, mendova nuk ishte gjë, por me kalimin e kohës po shtoheshin këto dhimbje. Nuk mbaj mënd asgjë nga provat e fundit me 180 KG, menjëherë sapo u largova nga pedana humba ndjenjat dhe më dërguan në spital”, deklaroi për Top Channel peshëngritësi.

Calja ka qëndruar për reth 5 orë në spital, ku i është dhënë ndihma e shpejtë dhe më pas ka bërë analizat përkatëse. Sipas përgjigjes së tyre, mjekët i kanë thënë se ka patur një dehidratim 3 herë mbi normat dhe kjo i ka sjellë humbjen e ndjenjave. Tashmë është normalizuar sa i përket gjëndjes shëndetësore për sportistin shqiptar dhe pas kësaj situate, Calja tregon se pavarësisht të gjithave është i kënaqur për rezultatin e arritur.

“Të jesh i katërti në botë nuk është një rezultat i keq. Vendi ynë në hartë nuk është as sa një majë stilolapsi, jo më të dalim të katërtit në botë, duke patur parasysh kushtet. Megjithatë më vjen inat sepse humba një medaljeje të artë në shtytje dhe një të argjendtë në dygarësh”, tha Calja.

Briken Calja garoi në peshën 69 kg, në stilin e shkëputjes u rendit i katërti me 142 kg, ndërsa stilin e shtytjes, ai u rendit në vendin e pestë pasi ngriti 175 kg. Në total në dygarësh Briken Calja u rendit në vendin e katërt me 317 kg.